ఢిల్లీ తుగ్లక్ రోడ్ 23లో సిఎం రేవంత్‌కు అధికారిక నివాసం సిద్ధం
ఇదే ఇంట్లో 20 ఏళ్లపాటు ఉన్న కెసిఆర్
న్యూఢిల్లీః తెలంగాణ ముఖ్యమంత్రి రేవంత్‌రెడ్డి కోసం దేశరాజధాని ఢిల్లీలో అధికారిక నివాసం సిద్ధమైంది. తుగ్లక్ రోడ్ 23లోని అధికారిక నివాసానికి చిన్నచిన్న మరమ్మతులు చేసి పూర్తిగా సిద్ధం చేశారు. మాజీ ముఖ్యమంత్రి కెసిఆర్ పేరుతో ఉన్న నేమ్‌ప్లేట్‌ను తొలగించి దాని స్థానంలో తెలుగు, హిందీ, ఇంగ్లిష్ భాషల్లో రేవంత్‌రెడ్డి పేరుతో నేమ్‌ప్లేట్ ఏర్పాటు చేశారు.
రేవంత్‌కు కేటాయించిన ఈ ఇంట్లో కెసిఆర్ దాదాపు 20 సంవత్సరాలపాటు ఉన్నారు. 2004లో కేంద్రమంత్రి హోదాలో కెసిఆర్ ఈ ఇంటికి మారారు. ఆ తర్వాత ఉద్యమ నేత, సీఎంగా ఈ ఇంటిని కొనసాగించారు. ఇప్పుడు అధికారం కోల్పోవడంతో ఖాళీ చేయక తప్పలేదు. కెసిఆర్ కు సంబంధించిన వస్తువులను ఆ ఇంటి నుంచి ఇటీవలే అధికారులు తరలించారు. కాగా, నేడు ఢిల్లీ వెళ్తున్న రేవంత్‌రెడ్డి ఇదే ఇంట్లో దిగుతారా? లేదా? అనే విషయంలో స్పష్టత లేదు.
