బ్రిటన్లో కొత్తగా 101 ఒమిక్రాన్ కేసులు నమోదు
ప్రజలు అప్రమత్తంగా ఉండాలని సూచన
లండన్ : దక్షిణాఫ్రికాలో పుట్టి ప్రపంచాన్ని వణికిస్తున్న కరోనా నయా వేరియంట్ ఒమిక్రాన్ ఇప్పుడు బ్రిటన్ను భయపెడుతోంది. ఒకే రోజు 101 కొత్త కేసులు రికార్డయ్యాయి. తాజా కేసులతో కలిపి మొత్తం కేసుల సంఖ్య 437కు చేరుకుందని బ్రిటిన్ ఆరోగ్య అధికారులు తెలిపారు. డెల్టా వేరియంట్ కంటే కొత్త వేరియంట్ వేగంగా వ్యాప్తి చెందుతుందన్న నేపథ్యంలో బ్రిటీష్ ప్రధాని బోరిస్ జాన్సన్ కేబినెట్ సమావేశంలో కొవిడ్ పరిస్థితులపై మంత్రులతో సమీక్షించారు. వైరస్ కట్టడికి మరిన్ని చర్యలు చేపట్టాలని నిపుణులు సూచించారు.
ఒమిక్రాన్ కేసులు పెరుగుతున్నందున అప్రమత్తంగా ఉండాలని కోరారు. ఆరోగ్యశాఖ వివరాల ప్రకారం.. బ్రిటన్లో కొత్తగా 45,691 కొవిడ్ కేసులు నమోదయ్యాయి. దీంతో దేశంలో మొత్తం కేసుల సంఖ్య 10,560,341కు చేరింది. మరో 180 కరోనా మరణాలు రికార్డవగా.. మొత్తం సంఖ్య 1,45,826కు చేరింది. బ్రిటన్లో 12 ఏళ్లు అంతకంటే ఎక్కువ వయస్సున వారిలో దాదాపు 89శాతం మంది మొదటి డోసు టీకా తీసుకున్నారు. 81శాతం కంటే ఎక్కువ మంది రెండు డోసుల టీకా తీసుకున్నారు.
తాజా సినిమా వార్తల కోసం క్లిక్ చేయండి: https://www.vaartha.com/news/movies/