ఆఫ్రికా దేశంలో సైన్యం తిరుగుబాటు.. బందీగా దేశాధ్యక్షుడు
నియామే: పశ్చిమ ఆఫ్రికా దేశమైన నైజర్లో ఉద్రిక్త పరిస్థితులు నెలకొన్నాయి. అధ్యక్షుడు మహ్మద్ బజౌమ్కు వ్యతిరేకంగా సైన్యం తిరుగుబాటు ను ప్రకటించింది. దేశాధ్యక్షుడికి వ్యతిరేకంగా తిరుగుబాటు చేపడుతున్నట్లు జాతీయ ఛానల్లో సైన్యం వెల్లడించింది. దేశ రాజ్యాంగాన్ని రద్దు చేస్తున్నట్లు ప్రకటించారు. అన్ని జాతీయ సంస్థలను, సరిహద్దుల్ని మూసివేస్తున్నట్లు సైనికులు తెలిపారు. దేశాధ్యక్షుడు మొహమ్మద్ బజౌమ్ తమ ఆధీనంలో ఉన్నట్లు సైనికులు వెల్లడించారు.
ప్రెసిడెన్షియల్ గార్డ్స్కు చెందిన దళాలు అధ్యక్ష భవనాన్ని సీజ్ చేశారు. రాజధాని నియామేలో ఉన్న ప్రభుత్వ కార్యాలయాలను కూడా స్వాధీనం చేసుకున్నారు. అధ్యక్షుడు బజౌమ్తో జరిగిన చర్చలు విఫలం అయ్యాయని, అందుకే ఆయన్ను రిలీజ్ చేయడం లేదని సైనికులు తెలిపారు. అధ్యక్షుడు బజౌమ్ అరెస్టును అమెరికా, ఐక్యరాజ్యసమితి ఖండించాయి. పశ్చిమ ఆఫ్రికాలో ఇస్లామిక్ ఉగ్రవాదాన్ని అణిచివేయడంలో బజౌమ్ కీలక పాత్ర పోషించారు. పశ్చిమ దేశాలకు ఆయన మంచి సపోర్టు ఇచ్చారు. ఇటీవల నైజర్ పొరగు దేశాలైన మాలి, బుర్కినా ఫాసోలో కూడా సైనిక తిరుగుబాట్లు చోటుచేసుకున్నాయి.