ఏపీ క్యాబినెట్ తీసుకున్న నిర్ణయాలు ఇవే

మంగళవారం సీఎం జగన్ అధ్యక్షతన క్యాబినెట్ భేటీ జరిగింది. సచివాలయంలోని మొదటి బ్లాక్‌లోని మంత్రివర్గ సమావేశ మందిరంలో ఈ సమావేశం జరిగింది. ఈ మంత్రివర్గ సమావేశంలో తీసుకున్న నిర్ణయాలను మంత్రి చెల్లుబోయిన వేణుగోపాలకృష్ణ మీడియాకు తెలిపారు. ముందుగా ఆర్ఆర్ఆర్ చిత్రంలోని ‘నాటు నాటు’ పాటకు గాను ఆస్కార్ అవార్డు రావడం పట్ల చిత్రబృందానికి ఏపీ క్యాబినెట్ అభినందనలు తెలిపిందని వెల్లడించారు.

షెడ్యూల్డ్ కులాల చట్ట సవరణ బిల్లుకు క్యాబినెట్ ఆమోదం తెలిపిందని మంత్రి తెలిపారు. వివిధ కమిషన్ల చైర్మన్ల పదవీకాలం కుదింపు చట్టసవరణకు ఆమోదించారు. బీసీ, ఎస్టీ, మైనారిటీ, మహిళా కమిషన్ చైర్మన్ల పదవీకాలం రెండేళ్లకు కుదించాలన్న నిర్ణయానికి ఆమోదం లభించినట్టు వెల్లడించారు. ఏపీ మీడియా అక్రిడేషన్ నిబంధనల సవరణకు, ఏపీ పబ్లిక్ లైబ్రరీ చట్ట సవరణకు ఆమోదం తెలిపినట్టు మంత్రి వేణుగోపాలకృష్ణ పేర్కొన్నారు. ఎయిడెడ్, అన్ ఎయిడెడ్, ఎడ్యుకేషన్ ఆర్డినెన్స్ ప్రతిపాదనకు ఆమోదించినట్టు వివరించారు.