లోక్‌సభలో అవిశ్వాస తీర్మానంపై రాహుల్ గాంధీ ప్రసంగం
న్యూఢిల్లీః లోక్‌సభలో కేంద్ర ప్రభుత్వంపై విపక్ష కూటమి ‘ఇండియా.. ’ ప్రవేశపెట్టిన అవిశ్వాస తీర్మానంపై రెండోరోజు చర్చ ప్రారంభమైంది. ఉదయం 11 గంటలకు సభ ప్రారంభం కాగా.. మధ్యాహ్నం 12 గంటలకు అవిశ్వాసంపై చర్చను ప్రారంభించారు. కాంగ్రెస్‌ అగ్రనేత రాహుల్‌గాంధీ చర్చను ప్రారంభించి ప్రసంగిస్తున్నారు. ప్రధాని మోడీ మణిపుర్ వెళ్లలేదని.. కానీ తాను వెళ్లానని రాహుల్ అన్నారు. భారత్లో మణిపుర్ లేకుండా మోడీ చేశారని విమర్శించారు. మణిపుర్ ప్రజలకు ప్రధాని మోడీ కనీస భరోసాను కల్పించలేక పోయారని మండిపడ్డారు.
‘బిజెపి వాళ్లు భయపడాల్సిన అవసరం లేదు. అదానీ అంశంపై నేను ఈరోజు మాట్లాడను. ఈరోజు హృదయంతో మాట్లాడతాను. ఇటీవల నేను దేశం ఒక మూల నుంచి మరో మూలకు పాదయాత్ర చేశాను. పాదయాత్ర ఎందుకు చేస్తున్నావని చాలామంది నన్ను అడిగారు. కన్యాకుమారి నుంచి కశ్మీర్‌ వరకు పాదయాత్ర చేయడం వెనుక నీ లక్ష్యం ఏంటని అడిగారు. భారత దేశాన్ని అర్థం చేసుకునేందుకు, ప్రజలను కలిసేందుకు పాదయాత్ర చేయాలనుకున్నా. పాదయాత్ర కొనసాగుతున్న కొద్దీ.. నాలో అహంకారం క్రమంగా మాయమైంది. పాదయాత్రలో రోజూ విభిన్న రంగాల వారిని కలిశాను.’ అని రాహుల్ తన ప్రసంగంలో పేర్కొన్నారు.
