ఓటమి భయంతోనే చంద్రబాబును అరెస్ట్ చేశారుః మేకపాటి చంద్రశేఖర్
అరెస్ట్ తో వైఎస్‌ఆర్‌సిపి రాజకీయంగా నేలమట్టమయిందని వ్యాఖ్య
అమరావతిః ఏపీ ముఖ్యమంత్రి జగన్ పై వైఎస్‌ఆర్‌సిపి బహిష్కృత ఎమ్మెల్యే మేకపాటి చంద్రశేఖర్ రెడ్డి విమర్శలు గుప్పించారు. తండ్రి వైఎస్ రాజశేఖరరెడ్డి పేరును అడ్డం పెట్టుకుని, స్వార్థం కోసం జగన్ సీఎం అయ్యారని మండిపడ్డారు. జగన్ కు ఓటమి భయం పట్టుకుందని, ఎన్నికల్లో ఓడిపోతాననే భయంతోనే చంద్రబాబును అరెస్ట్ చేశారని ఎద్దేవా చేశారు. చంద్రబాబు అరెస్ట్ వల్ల జగన్ కే నష్టమని… టిడిపికి లాభమేనని చెప్పారు. ఎన్నికలను న్యాయంగా నిర్వహిస్తే గెలిచేది టిడిపినే అని, చంద్రబాబే సీఎం అని అన్నారు. చంద్రబాబు అరెస్ట్ తో వైఎస్‌ఆర్‌సిపి రాజకీయంగా నేలమట్టమయిందని వ్యాఖ్యానించారు. తన అన్ని మేకపాటి రాజమోహన్ రెడ్డి వల్లే తాను వైఎస్‌ఆర్‌సిపి నుంచి సస్పెండ్ అయ్యానని చెప్పారు. నెల్లూరు జిల్లా మర్రిపాడులో మీడియాతో మాట్లాడుతూ ఆయన ఈ వ్యాఖ్యలు చేశారు. మరోవైపు నిన్న ఆయన మాట్లాడుతూ… చంద్రబాబు జైలు నుంచి విడుదలైన తర్వాత తాను టిడిపిలో చేరుతానని చెప్పారు.
