వెల కట్టలేని ఈ అభిమానానికి, వాత్సల్యానికి నేను సర్వదా కృతజ్ఞుడిని – పవన్ కళ్యాణ్

వెల కట్టలేని ఈ అభిమానానికి, వాత్సల్యానికి నేను సర్వదా కృతజ్ఞుడిని - పవన్ కళ్యాణ్

వెల కట్టలేని ఈ అభిమానానికి, వాత్సల్యానికి నేను సర్వదా కృతజ్ఞుడిని అంటూ తనకు విషెష్ అందించిన ప్రతి ఒక్కరికి కృతజ్ఞతలు తెలుపుతూ నోట్ విడుదల చేసారు. నిన్న (సెప్టెంబర్ 02 ) పవన్ కళ్యాణ్ పుట్టిన రోజు ఈ సందర్బంగా అభిమానులు , సినీ ప్రముఖులు , రాజకీయనేతలు , కుటుంబ సభ్యులు ఇలా ప్రతి ఒక్కరు ఆయనకు బెస్ట్ విషెష్ ను అందజేశారు. అలాగే పలు సేవ కార్యక్రమాలు చేసి వారి అభిమానాన్ని చాటుకున్నారు. ఈ తరుణంలో తనపై అంత అభిమానం , ప్రేమను పంచిన వారికీ కృతజ్ఞతలు తెలిపారు.

“ఎనలేని ప్రేమాభిమానాలకు కృతజ్ఞతలు

నా చుట్టూ ఉన్న సమాజం ఎల్లవేళలా క్షేమంగా ఉండాలనే భగవంతుణ్ణి ప్రార్థిస్తుంటాను. యేడాదిన్నర కాలంగా దేశం కరోనా మహమ్మారితో పోరాడుతూనే ఉంది. సెకండ్ వేవ్ ప్రభావం నుంచి ఇప్పుడిప్పుడే కుదుటపడుతుంది. కష్ట జీవుల జీవనం ఇంకా గాడినపడలేదు. ఇలాంటి క్లిష్ట సమయంలో జన్మదిన శుభాకాంక్షలు అందుకోలేను అనే ఉద్దేశంతో దైవ చింతనలో గడిపాను. సహజంగానే నేను పుట్టిన రోజు వేడుకలకు దూరంగా ఉంటానని నన్ను అభిమానించేవారికి తెలుసు.
నాపై ఉన్న అపార ప్రేమాభిమానాలతో ఎందరో హితైషులు, సన్మిత్రులు, శ్రేయోభిలాషులు, సమాజ సేవకులు, రాజకీయ నేతలు, సినీ తారలు, దర్శకులు, సాంకేతిక నిపుణులు, మీడియా ప్రతినిధులు, ప్రవాస భారతీయులు, నన్ను తమలో ఒకడిగా భావించే అభిమానులు, జన సైనికులు, వీర మహిళలు, జనసేన నాయకులు సామాజిక మాధ్యమాల ద్వారా శుభాకాంక్షలు అందచేశారు. జనసేన శ్రేణులు, అభిమానులు సామాజిక సేవ కార్యక్రమాలు చేపట్టి తమ అభిమానాన్ని సేవామార్గంలో వెల్లడించారు. పెద్దలు, రాజ్యాంగబద్ధ పదవుల్లో ఉన్నవారు శుభాశీస్సులు అందించారు. ప్రతి ఒక్కరూ ఎంతో వాత్సల్యంతో నాకు శుభాకాంక్షలు అందించారు. వెల కట్టలేని ఈ అభిమానానికి, వాత్సల్యానికి నేను సర్వదా కృతజ్ఞుడిని. అందరికీ పేరుపేరునా మనస్ఫూర్తిగా ధన్యవాదాలు తెలియచేస్తున్నాను. (పవన్ కల్యాణ్) “అంటూ పవన్ అందరికి శుభాకాంక్షలు తెలియజేశారు.