ప్రధాని మోడీ కటౌట్‌పై వాననీటిని కండువాతో తుడిచిన అభిమాని
ఘటన వీడియోను షేర్ చేసిన హోం మంత్రి అమిత్ షా
న్యూఢిల్లీః ప్రధాని మోడీ కటౌట్‌పై పడ్డ వాన నీటిని తన కండువాతో తుడిచిన అభిమాని వీడియోను హోం మంత్రి అమిత్ షా తాజాగా షేర్ చేశారు. ఈ అభిమానమే బిజెపి శక్తి అంటూ ఆయన చేసిన ట్వీట్ ప్రస్తుతం వైరల్‌గా మారింది. కర్ణాటకలోని దేవనహళ్లి ప్రాంతంలో శుక్రవారం బిజెపి రోడ్ షో ప్లాన్ చేసింది. పలు ప్రాంతాల్లో మోడీ కటౌట్లు ఏర్పాటు చేసింది. ఈ సభకు హోం మంత్రి అమిత్ షా కూడా హాజరుకావాల్సి ఉంది. అయితే.. వర్షం కారణంగా ఈ రోడ్ షో రద్దయిపోయింది.
ఈ క్రమంలో ఓ మోడీ కటౌట్‌పై వాన చినుకులను చూసిన అభిమాని ఒకరు తన కండువాతో వాటిని తుడిచేశాడు. పక్కనే ఉన్న మరో వ్యక్తి ఇదంతా వీడియో తీశాడు. డబ్బుల కోసం ఇదంతా చేస్తున్నావా? అని అతడు ఆ అభిమానిని ప్రశ్నించగా..‘‘నాకు డబ్బులు అవసరం లేదు. నేను ఎవరి నుంచీ డబ్బులు ఆశించను. మోడీపై విశ్వాసం, ప్రేమాభిమానాలతోనే ఇదంతా చేస్తున్నా’’ అని చెప్పుకొచ్చాడా అభిమాని. అంతేకాకుండా.. మోడీ మాకు దేవుడు అంటూ తీవ్రభావోద్వేగానికి లోనవుతూ సమాధానమిచ్చాడు.
ఈ వీడియోను హోం మంత్రి అమిత్‌షా ట్విట్టర్‌‌లో షేర్ చేశారు. ‘‘మోడీపై అచంచల విశ్వాసం, నిస్వార్థ ప్రేమాభిమానాలే బిజెపి బలం, ఆస్తి. ఈ అద్భుతమైన వీడియో చూడండి’’ అంటూ కామెంట్ చేశారు. దీనిపై రాష్ట్ర బిజెపి శాఖ కూడా స్పందించింది. రాష్ట్రంలో అనేక మంది మోడీని తమ కుటుంబసభ్యుడిగా భావిస్తారని వ్యాఖ్యానించింది.
