డిసెంబర్ లోనే అసలైన సినీ సంక్రాంతి మొదలు
సంక్రాంతి వస్తుందంటే సినీ ప్రేమికులకు సంబరమే. తమ అభిమాన హీరోల చిత్రాలు రిలీజ్ అవుతుంటాయి. ఈసారి కూడా అదే రీతిలో రిలీజ్ కాబోతున్నాయి. ఆర్ఆర్ఆర్ , భీమ్లా నాయక్ , రాధే శ్యామ్ వంటి భారీ చిత్రాలు బరిలోకి దిగబోతున్నాయి. అయితే అంతకంటే ముందే డిసెంబర్ సినీ సందడి మొదలుకాబోతుంది.
డిసెంబర్ -2 న బాలయ్య అఖండ రిలీజ్ కాబోతుంది. బాలయ్య-బోయపాటి కలయికలో రాబోతున్న హ్యాట్రిక్ మూవీ ఇది. ‘సింహా’, ‘లెజెండ్’ బ్లాక్బస్టర్లుగా నిలవడం వల్ల ఈ సినిమాపై అంచనాలు భారీగా ఉన్నాయి. అందుకు తగ్గట్లే ట్రైలర్, పాటలు రూపొందించారు! ఇటీవల విడుదలైన అవి అలరిస్తూ.. చిత్రం ఎప్పుడెప్పుడు థియేటర్లలోకి వస్తుందా అని ప్రేక్షకులను ఆత్రుతగా ఎదురుచూసేలా చేస్తోంది.
డిసెంబరు 4 న స్కైలాబ్ చిత్రం రాబోతుంది. అంతరిక్షంలోకి ప్రవేశపెట్టిన స్కైలాబ్ ఉపగ్రహం సాంకేతిక కారణాలతో భూమిపై పడిపోనుందనే నేపథ్యంగా ఈ సినిమా తెరకెక్కింది. నిత్యామేనన్, సత్యదేవ్, రాహుల్ రామకృష్ణ ప్రధాన పాత్రల్లో నటించారు. తెలంగాణలోని బండ లింగపల్లి అనే పల్లెటూరిలో 1979 టైమ్ పీరియాడ్లో జరిగిన కథ ఆధారంగా ఈ సినిమా తీశారు.
డిసెంబర్ 10 న గుడ్లక్ సఖి చిత్రం రాబోతుంది. కీర్తి సురేశ్ , జగపతి బాబు ప్రధాన పాత్రల్లో తెరకెక్కిన ఈ మూవీ ఎప్పుడో రిలీజ్ కావాల్సి ఉండగా..ప్రతి సారి వాయిదా పడుతూ వస్తుంది. రీసెంట్ గా డిసెంబర్ 10 న రాబోతుందని ప్రకటించారు.
డిసెంబరు 17 న పుష్ప రాబోతుంది. అల్లు అర్జున్ – సుకుమార్ కలయికలో తెరకెక్కిన ఈ పాన్ మూవీ ఫై భారీ అంచనాలే నెలకొని ఉన్నాయి. ఇప్పటికే విడుదలైన టీజర్, పాటలు, లుక్స్ రోజురోజుకూ హైప్ పెంచుతున్నాయి. ఎర్రచందనం స్మగ్లింగ్ నేపథ్యంగా తీస్తున్న ఈ సినిమాలో లారీ డ్రైవర్ నుంచి డాన్గా మారిన పాత్రలో బన్నీ కనిపించనున్నట్లు తెలుస్తోంది.రష్మిక హీరోయిన్గా నటిస్తుండగా, సమంత స్పెషల్ సాంగ్ చేయనుంది. ఫహాద్ ఫాజిల్, సునీల్, అనసూయ తదితరులు ప్రతినాయక పాత్రల్లో కనిపించనుండటం విశేషం.
డిసెంబరు 24 న ‘గని’ , ‘శ్యామ్సింగరాయ్’ చిత్రాలు రాబోతున్నాయి. నాని ‘శ్యామ్సింగరాయ్’గా థియేటర్లలోకి రానున్నారు. ఇందులో నాని ద్విపాత్రాభినయం చేస్తుండగా.. సాయిపల్లవి, కృతిశెట్టి, మడోన్నా సెబాస్టియన్ హీరోయిన్లు. ఇక గని విషయానికి వస్తే..ఈ మూవీ లో వరుణ్ తేజ్ బాక్సర్ గా కనిపించబోతున్నారు. మొత్తం మీద సినీ ప్రేమికులకు సంక్రాంతి కంటే ముందే సినీ సంక్రాంతి డిసెంబర్ లో మొదలుకాబోతుంది.
