ఘోర బస్సు ప్రమాదం ..అహోబిలం వద్ద లోయలోపడ్డ ఆర్టీసీ బస్సు

ఈ మధ్య ఏపీలో వరుసగా ఆర్టీసీ బస్సులు ప్రమాదానికి గురి అవుతున్నాయి. ఓ ఘటన మరచిపోయేలోపే మరో ఘటన చోటుచేసుకుంటుంది. ఈరోజు కర్నూలు జిల్లా అహోబిలం వద్ద ఘోర రోడ్డు బస్సు ప్రమాదం చోటుచేసుకుంది.

నల్లమల అటవీ ప్రాంతంలో ఆళ్లగడ్డ డిపోకు చెందిన ఆర్టీసీ బస్సు లోయలో పడింది. ఈ ప్రమాదంలో 10 మంది ప్రయాణికులు గాయపడ్డారు. వీరిలో నలుగురి పరిస్థితి విషమంగా ఉన్నట్లు పోలీసులు తెలిపారు. ఆళ్లగడ్డ నుంచి అహోబిలం క్షేత్రానికి వెళ్లిన ఆర్టీసీ బస్సు.. తిరిగి వచ్చే క్రమంలో వెనక్కి తిప్పుతుండగా అదుపుతప్పి లోయలో పడింది. ఈ ప్రమాద సమాచారం తెలుసుకున్న పోలీసులు వెంటనే ఘటనాస్థలికి చేరుకున్నారు. గాయపడిన వారిని బయటకు తీసి రెండు అంబులెన్సుల ద్వారా స్థానిక ప్రభుత్వాసుపత్రికి తరలించారు. ఈ ఘటనకు సంబంధించి కేసు నమోదు చేసుకున్న పోలీసులు దర్యాప్తు చేస్తున్నారు.