కోహ్లీ నువ్వొక అసాధారణ ఆటగాడివి: అఫ్రిది…

kohli and afridi
kohli and afridi


కరాచీ: టీమిండియా కెప్టెన్‌ విరాట్‌ కోహ్లీపై పాకిస్తాన్‌ మాజీ ఆల్‌రౌండర్‌ షాహిద్‌ అఫ్రిది ప్రశంసలు కురిపించాడు. దక్షిణాఫ్రికాతో జరిగిన రెండో టీ20లో భారత్‌ విజయంలో కోహ్లీ ముఖ్య భూమిక పోషించడాన్ని ప్రస్తావిస్తూ అఫ్రిది కొనియాడాడు. అంతర్జాతీయ టీ20ల్లో కోహ్లీ అత్యధిక అర్థ సెంచరీలు విషయాన్ని ఐసిసి ట్వీట్‌ చేయగా, అందుకు అఫ్రిది రీట్వీట్‌ చేస్తూ కోహ్లీని ప్రశంసించాడు. కోహ్లీ నువ్వొక అసాధారణ ఆటగాడివి. నీ సక్సెస్‌ ఇలానే కొనసాగాలి. ప్రపంచంలోని క్రికెట్‌ అభిమానుల్ని నీ ఆట తీరుతో మరింత అలరించు అని అఫ్రిది పేర్కొన్నాడు. సఫారీలతో మూడు టీ20ల సిరీస్‌లో భాగంగా రెండో మ్యాచ్‌లో కోహ్లీ అజేయంగా అర్థ సెంచరీ సాధించాడు. ఫలితంగా అంతర్జాతీయ టీ20ల్లో అత్యధిక అర్థ సెంచరీలు చేసిన ఆటగాడిగా కోహ్లీ నిలిచాడు. ఈ క్రమంలోనే రోహిత్‌ శర్మ (21 అర్థ సెంచరీలు)ను కోహ్లీ అధిగమించాడు. దక్షిణాఫ్రికా నిర్ధేశించిన 150 పరుగుల టార్గెట్‌లో కోహ్లీ తనదైన మార్కుతో చెలరేగిపోయాడు. 52బంతుల్లో 4ఫోర్లు, 3 సిక్సర్ల సాయంతో 72 పరుగులు చేసి నాటౌట్‌గా ఉన్నాడు.
తాజా క్రీడల వార్తల కోసం క్లిక్‌ చేయండి..https://www.vaartha.com/news/sports/