యువరాజ్‌ జెర్సీకి రిటైర్మెంట్‌ ఇవ్వాలి..

yuvaraj
yuvaraj


న్యూఢిల్లీ: ప్రపంచకప్‌ల హీరో, టీమిండియా మాజీ క్రికెటర్‌ యువరాజ్‌ సింగ్‌ జెర్సీ నంబర్‌ 12ని మరెవరికీ కేటాయించకుండా దానికి రిటైర్మంటివ్వాలని మాజీ ఓపెనర్‌ గౌతమ్‌ గంభీర్‌ భారత క్రికెట్‌ బోర్డు (బిసిసిఐ)కి విజ్ఞప్తి చేసినట్లు సమాచారం తెలుస్తోంది. గౌతమ్‌ గంభీర్‌ గత డిసెంబర్‌లో క్రికెట్‌ ఆటకు రిటైర్మెంట్‌ ప్రకటించి రాజకీయాల్లోకి వచ్చారు. మరోవైపు యువరాజ్‌ సింగ్‌ ఈ జూన్‌లో అంతర్జాతీయ క్రికెట్‌కు వీడ్కోలు పలికిన విషయం తెలిసిందే. యువీ ప్రస్తుతం విదేశీ లీగ్‌లపై దృష్టి సారించారు. ఇటీవల ముగిసిన కెనడా టీ20 లీగ్‌లో యువీ తన మునుపటి ఫామ్‌ చూపిస్తూ సిక్సర్ల వర్షం కురిపించారు. గంభీర్‌ ఓ మీడియాకు రాసిన కథనంలో పలు విషయాలను ప్రస్తావించారు. యువీ టీం ఇండియాకు ప్రాతినిధ్యం వహిస్తున్నప్పుడు అతడు జెర్సీ నంబర్‌ 12ను ధరించేవాడు. టీమిండియాకు రెండుసార్లు (2007 టీ20 ప్రపంచకప్‌, 2011 వన్డే ప్రపంచకప్‌) ప్రపంచకప్‌ అందించిన యవీకి ఇదే (జెర్సీ రిటైర్మెంట్‌) అత్యుత్తమ గౌరవమని బిజెపి ఎంపి గంభీర్‌ పేర్కొన్నాడు. సెప్టెంబర్‌ నెల తన హృదయంలో ప్రత్యేక స్థానాన్ని ఏర్పరుచుకుంది. ఎందుకంటే. 2007లో టీమిండియా ఇదే నెలలో తొలిసారి టీ20 ప్రపంచకప్‌ గెలిచిందని గంభీర్‌ గుర్తుచేశాడు.

తాజా క్రీడావార్తల కోసం క్లిక్‌ చేయండి..https://www.vaartha.com/news/sports/