బంగారంపై కేంద్రం కీలక నిర్ణయం ?

gold
gold

న్యూఢిల్లీ: ప్రధాని నరేంద్రమోడి సాహసోపేత నిర్ణయం తీసుకునేందుకు రెడీ అయ్యారా? వెలువడుతున్న నివేదికలను గమనిస్తే.. అవుననే సమాధానం వినిపిస్తోంది. ఈ నిర్ణయం అమలులోకి వస్తే డీమోనిటైజేషన్ తర్వాత నల్లధనాన్ని అరికట్టేందుకు ఇదే రెండో కీలక నిర్ణయంగా నిలువనుంది. కాగా పెద్ద నోట్ల రద్దుతో సాహసోపేత నిర్ణయం తీసుకున్న ప్రధాని నరేంద్ర మోడి మళ్లీ ఇప్పుడు మరో సంచలనానికి సిద్ధమయ్యారు. నల్లధనాన్ని అరికట్టేందుకు ఈసారి బంగారాన్ని టార్గెట్ చేశారు. కేంద్ర ప్రభుత్వం గోల్డ్ ఆమ్నెస్టీ స్కీమ్‌ను ప్రకటించ్చేందుకు రెడీ అవుతోందనే నివేదికలు వెలువడుతున్నాయి.

ఈ స్కీమ్ అమలులోకి వస్తే.. నల్ల ధనాన్ని అరికట్టేందుకు మోడి సర్కార్ తీసుకున్న రెండో అతిపెద్ద నిర్ణయం ఇదే అవుతుంది. 2016 డీమోనిటైజేషన్ నిర్ణయం తీసుకున్న విషయం తెలిసిందే. వెలువడుతున్న నివేదికల ప్రకారం చూస్తే.. రశీదులేని బంగారం వివరాలను కేంద్ర ప్రభుత్వానికి తెలియజేయాల్సి ఉంటుంది. కేంద్ర ప్రభుత్వం నిర్ణయించే రేటు ప్రకారం దీనికి పన్ను చెల్లించాలి. గతంలో ఇన్‌కమ్ ట్యాక్స్ ఆమ్నెస్టీ స్కీమ్ మాదిరిగా ఇప్పుడు గోల్డ్ ఆమ్నెస్టీ స్కీమ్ కూడా నిర్దేశిత కాలం వరకు ప్రజలకు అందుబాటులో ఉంటుంది. ఈ కాలంలో బంగారం వివరాలను ప్రభుత్వానికి తెలియజేయాల్సి ఉంటుంది. దీంతో జరిమానాతో బయటపడొచ్చు. అదే స్కీమ్ కాలం ముగిసిన తర్వాత రశీదులేని బంగారం మీ వద్ద బయటపడితే కఠిన చర్యలు ఉండొచ్చనే అంచనాలున్నాయి. ఇకపోతే కేంద్ర ప్రభుత్వం ఎప్పటి నుంచో బంగారానికి ఒక నిర్దిష్టమైన పాలసీని తీసుకురావాలని భావిస్తోంది. ఇందులో భాగంగానే నీతి ఆయోగ్‌తోనూ కలిసి ముందుకు వెళ్తోంది. సమగ్రమైన గోల్డ్ పాలసీలో భాగంగానే ఇప్పుడు మోడి సర్కార్ గోల్డ్ ఆమ్నెస్టీ స్కీమ్‌ను ప్రకటించనుందని జాతీయా మీడియా పేర్కొంటోంది.


తాజా వీడియోస్‌ కోసం క్లిక్‌ చేయండి:https://www.vaartha.com/videos/