నీషమ్ ఏప్రిల్‌లో చూసుకుందాం: రాహుల్
మౌంట్ మౌంగనూయి: మూడు వన్డేల సిరీస్‌లో భాగంగా మంగళవారం జరిగిన చివరి వన్డేలో టీమిండియా బ్యాట్స్‌మన్ కేఎల్ రాహుల్, న్యూజిలాండ్ ఆల్‌రౌండర్ జేమ్స్ నీషమ్‌తో గొడవపడిన విషయం తెలిసిందే. అయితే మైదానంలో వాదులాడుకున్న ఈ ఇద్దరూ.. మ్యాచ్ అనంతరం ట్విటర్ వేదికగా మరోసారి తలపడ్డారు. కాకపోతే మైదానంలోలాగా వాడివేడిగా కాకుండా సరదాగా.. సంభాషించుకున్నారు. ఈ వ్యవహారం నెట్టింట హల్‌చల్ చేయడంతో జేమ్స్ నీషమ్ ట్విటర్ వేదికగా స్పందించాడు. తొలుత రాహుల్.. అన్ని పరుగులు ఇప్పుడే చేయకు.. ఏప్రిల్ ఉంది సుమా.. కొన్ని దాచుకో’అంటూ రాహుల్ ఇన్నింగ్స్‌ను కొనియాడుతూ సరదాగా ట్వీట్ చేశారు. అనంతరం వారిద్దరి మధ్య జరిగిన గొడవ గురించి ఓ అభిమాని ప్రశ్నించగా.. అది చిన్న వాగ్వాదం అంతే.. ఎవరూ హద్దులు దాటలేదు’అంటూ బదులిచ్చాడు. ఆ వెంటనే ఈ గొడవకు సంబంధించిన ఫొటోకు పేపర్, కత్తెర, బండరాయి’అనే క్యాప్షన్‌తో ట్వీట్ చేశాడు. ఇక జిమ్మీ ట్వీట్‌కు రాహుల్ కూడా సరదాగా స్పందించాడు. ఈ గొడవను ఏప్రిల్‌లో పరిష్కరించుకుందాం.. సీ యూ’అంటూ ట్వీట్ చేశాడు. మైదానంలో ఒకరిపై ఒకరు నోరుపారేసుకున్న ఆటగాళ్లు మ్యాచ్ అనంతరం సరదాగా సంభాషించుకోవడంపై అభిమానులు ఆశ్చర్యం వ్యక్తం చేస్తున్నారు. దీంతో ఈ ట్వీట్స్ నెట్టింట హల్ చల్ చేస్తున్నాయి.
తాజా అంతర్జాతీయ వార్తల కోసం క్లిక్‌ చేయండి:https://www.vaartha.com/news/international-news/
