ఈ వార్త విస్మయానికి గురిచేస్తున్నాయి

ఏపినుంచి పరిశ్రమలు తరలిపోతుంటే ఉపాధి అవకాశాలు ఎలా మెరుగుపరుస్తారు?

Pawan kalyan
Pawan kalyan

అమరావతి: జనసేన అధినేత పవన్‌ కల్యాణ్‌ ఏపి నుండి కియా మోటార్స్ తరలిపోతుందనే వివాదంపై స్పందించారు. పరిశ్రమలోని యూనిట్లు పొరుగు రాష్ట్రానికి తరలిపోతున్నాయంటూ వస్తున్న వార్త విస్మయానికి గురిచేస్తున్నాయని పవన్ కల్యాణ్ అన్నారు. ఈ మేరకు ఓ ప్రకటన విడుదల చేశారు. ఈ వార్తను ప్రపంచానికి తెలియజేసింది ఏదో ఆషామాషీ సంస్థ కాదని, ‘రాయిటర్స్’ అనే ప్రఖ్యాత వార్తా సంస్థ అని వెల్లడించింది. రాష్ట్ర ప్రభుత్వ లోపభూయిష్ట విధానాలకు ఈ సంఘటన అద్దంపడుతోందని అన్నారు. రాష్ట్రంలో కొత్త పరిశ్రమల స్థాపనకు సానుకూల పరిస్థితులు నెలకొల్పాల్సిన ప్రభుత్వం, ఆ బాధ్యతను విస్మరిస్తోందని విమర్శించారు. కొత్త పరిశ్రమలు రాకపోగా, ఉన్న పరిశ్రమలు, సాఫ్ట్ వేర్ సంస్థలు రాష్ట్రం నుంచి వెళ్లిపోతున్నాయని, ఇలాంటి పరిస్థితుల్లో ఉపాధి అవకాశాలు ఏ విధంగా మెరుగవుతాయని ప్రశ్నించారు.

విశాఖలోని మిలీనీయం టవర్స్ నుంచి సాఫ్ట్ వేర్ సంస్థలను ఖాళీ చేయించడమంటే ఆ రంగం ఇకపై ఆంధ్రప్రదేశ్ వైపు చూడకుండా చేయడమే అవుతుందని పవన్ కల్యాణ్ విమర్శించారు. ఉపాధి కల్పనకు ఆస్కారం ఉన్న రంగాలను ప్రోత్సహించకపోగా నిరుత్సాహకర పరిస్థితులు సృష్టిస్తే ఆర్థికాభివృద్ధి ఏవిధంగా సాధ్యమవుతుందని ప్రశ్నించారు. ఏపీలో ఉపాధి అవకాశాలు పెంచి వలసలు అరికట్టాల్సిన ప్రభుత్వం ఆ బాధ్యతలను వదిలేసి రద్దులు, కూల్చివేతలు, తరలింపులు అంటోందని ధ్వజమెత్తారు. నిర్మాణాత్మక ఆలోచనలు, ప్రణాళికలు లేని పాలక పక్షాన్ని చూసే రాష్ట్రం నుంచి పారిశ్రామిక సంస్థలు తరలిపోతున్నాయన్న విషయాన్ని ప్రభుత్వం గ్రహించాలని సూచించారు.

తాజా తెలంగాణ వార్తల కోసం క్లిక్‌ చేయండి:https://www.vaartha.com/telangana/