బీహార్‌లో నూడుల్స్ ఫ్యాక్టరీలో ఘోర ప్రమాదం.. ఐదుగురు మృతి
బీహార్లోని ముజఫర్‌పూర్‌లో ఘోర ప్రమాదం చోటుచేసుకుంది. నూడిల్స్ ఫ్యాక్టరీలో బాయిలర్ పేలడంతో ఐదుగురు మృతి చెందగా..పలువురి పరిస్థితి సీరియస్ గా ఉంది. బేలా పారిశ్రామిక ప్రాంతంలోని మోదీ కుర్కురే, నూడిల్స్ పరిశ్రమలో బాయిలర్ పేలిపోయింది. పెద్ద ఎత్తున మంటలు అంటుకోవడంతో పలువురు మంటల్లో చిక్కుకున్నారు. ఈ ఘటనలో ఇప్పటివరకు ఐదుగురు కార్మికులు మృతి చెందినట్లు సమాచారం. మరో ఆరుగురు తీవ్రంగా గాయపడ్డారు. మృతుల సంఖ్య మరింత పెరిగే అవకాశం ఉన్నట్లు అధికారులు భావిస్తున్నారు.
ఈ ప్రమాదంలో మృతి చెందిన వారి వివరాలు ఇంకా తెలియాల్సి ఉంది. ప్రమాదం జరిగిన సమయంలో ఫ్యాక్టరీలో ఎంత మంది పనిచేస్తున్నారో తెలియరాలేదు. పేలుడు చాలా బలంగా ఉందని స్థానికులు తెలిపారు. పేలుడు జరిగిన ప్రదేశానికి 5-కిమీ దూరం వరకు వినిపించినట్లు వెల్లడించారు. మరోవైపు భారీ ఎగిసిపడుతున్న మంటలను ఆర్పేందుకు కనీసం 5 అగ్నిమాపక శకటాలు రంగంలోకి దిగాయి. పేలుడు ధాటికి పక్కనే ఉన్న సంస్థలు కూడా దెబ్బతిన్నాయని స్థానికులు తెలిపారు. ఈ ప్రమాదంతో గాయపడ్డ క్షతగాత్రులను స్థానిక అసుపత్రికి తరలించి చికిత్స అందిస్తున్నామని పోలీసులు తెలిపారు. మృతదేహాలను వెలికి పోస్టుమార్టం నిమిత్తం తరలిస్తున్నామన్నారు.
